شەوی هەناری

لە دێرزەمانەوە، شەوچلە — درێژترین شەوی ساڵ — لە کوردەواریدا شەوی کۆبوونەوە و پێکەوەبوون بووە. بنەماڵەکان لە دەوری یەکتر کۆدەبوونەوە، گەورەکان چیرۆکیان دەگێڕایەوە، منداڵان گوێیان دەگرت و سفرەکان بە هەنار و میوە ڕەنگین دەبوون. ئەو شەوانە تەنیا تێپەڕاندنی تاریکیی زستان نەبوون؛ پردێک بوون لە نێوان نەوەکاندا، کە یادەوەری و نەریت و خۆشەویستییان لە نەوەیەکەوە بۆ نەوەیەکی تر دەگواستەوە.

«شەوی هەناری» هەوڵێکە بۆ زیندووکردنەوەی ئەو گەرمی و جوانییە، لێرە، لە دووریی نیشتمان. شەوێکە بۆ پێکەوەبوون و خۆشەویستی؛ بۆ دڵگەرمکردنەوەی پەیوەندیی نێوان نەوەکان، بۆ ئەوەی گەورەکانمان بیرەوەرییەکانیان بگێڕنەوە و منداڵ و گەنجەکانمان ڕەگ و ڕیشەی خۆیان بناسن.

لە ئامێزی موزیکی کوردی و هەڵپەڕکێ و نەریتە ڕەسەنەکانماندا، هەنار دەبێتە هێمای ئەم شەوە: میوەیەک کە سەدان دەنکی سووری لەناو یەک توێکڵدا پاراستووە. هەروەک ئێمە؛ لە هەر شوێنێکی ئەم جیهانە بین، دڵەکانمان لە یەک ماڵدا کۆدەبنەوە.

بە بنەماڵە و هاوڕێکانتەوە وەرە، با پێکەوە شەوێکی درێژی زستان بکەینە شەوێکی پڕ لە گەرمی، پێکەنین و یادەوەریی جوان.